Müdrik sözlər və kəlamlar | Əbu Turxanın hikmət dünyası
- Bu günün hər əməli sabah üçün alın yazısıdır.
- Həyat eşqi həyatdan ikiəlli yapışmaq deyil, həyatı yüksək tutmaqdır.
- Özünü sevənlərin çoxu əslində özünü deyil, özləri haqqında uydurduqları obrazı sevirlər.
- İnsanın ən böyük səyahəti öz daxili aləminə səyahətidir.
- Ədəbiyyat – əbədiyyəti ana, anı əbədiyyətə çevirir.
- Haqqa çatmağın yolu haqq aşiqliyindən keçir.
- Keçmişi də, gələcəyi də ancaq indinin işığında görmək olar
- Müasirlik zəmanəyə bənzəməkdir.
- Böyük həqiqətləri görə bilmək üçün qəlbin alışıb-yanması, ətrafı nurlandırması tələb olunur.
- Qaranlıq quru ağac kimidir, qığılcım ancaq onun hesabına oda çevrilir.
- Uşaqlar yeriməyi yıxıla-yıxıla öyrəndiyi kimi, adamlar da həqiqətin yolunu yanıla-yanıla tapırlar.
- Özünü tanımayan insanlar öz həyatlarını yaşamırlar.
- Eşqsiz insan tək ölümdən yox, həyatdan da qorxur.
- Bəsirət gözü ariflərlə ünsiyyətdə açılır.
- Bütün sular ləpələnə bilər, dalğa isə ancaq dəryada olur.
- Dərində üzməyi bacaranlar üçün dayazda üzmək darıxdırıcı olur.
- Uca dağların yamacları da təpələrin zirvəsindən yüksəkdə durur.
- Hansısa bir əsəri ilə zirvəni fəth edənlər sonra bütün əsərlərini zirvəyə daşımağa çalışırlar.|
- Eyni vaxtda həm yaxını, həm də uzağı görmək olmaz; gözlər cismani həyat üçün qapanmasa, ilahi hikmətlər üçün açılmaz.
- Bəzən biz yolu seçirik, bəzən də yol bizi.
- Elə adamlar var ki, özləri yalan danışmaqdan qaçsalar da, yalançıların xidmətindən məmnuniyyətlə istifadə edirlər.
- Qanun hamı üçün eynidir; ləyaqət isə hər bir insanın özü üçün könüllü qoyduğu əlavə qadağalarla müəyyənləşir.
- Bu gün şüurlarda əsən xəfif meh sabah bütün cəmiyyəti sarsıdan qasırğaya çevrilə bilər.
- İdeyanı yaşatmaq onun uğrunda ölməkdən daha şərəflidir.
- İnam və səmimiyyətdən sui-istifadə siyasətdə – məharət, mənəviyyatda – rəzalət sayılır.
- Möcüzələr normaya çevriləndə, normal həyat möcüzə kimi görünür.
- Yaxındakı köz uzaqdakı Günəşdən daha betər yandıra bilər.
- Tarix elə bir ortaq sərvətdir ki, ondan hər xalq öz fərasətinə görə pay götürür.
- Keçmişimizin izlərini tarixin qaranlıqlarında deyil, bu günümüzün iç qatında axtarmalıyıq.
- Məqsədə gedən yolda çox qurbanlar vermək olar; məqsədin özündən başqa!
- Eyni nəticəyə müxtəlif yollarla gəlmək olar. Məharət bu yolların ən qısasını seçə bilməkdədir.
- Dünya eyni məzmunda, amma müxtəlif dillərdə yazılmış üç kitabdan ibarətdir: Müqəddəs kitab, təbiət və əql. Bunlar adətən ayrı-ayrılıqda oxunur və onların eyni kitab olduğunu çox az adam dərk edir.
- Bu dünya imkanla gerçəklik arasında qərar tutur. Biz sonsuz imkan dünyasında ancaq bir cığır seçib gedirik.
0 şərh